zindagi jab se shanasa-e-muhallat hui
sach to ye hai ki ḳhud apne se mulaqat hui
parda-e-gham jise samjha tha vahi ḳhamoshi
kal tiri bazm men mauzu-e-hakayat hui
ham ko ai qafila-e-shauq ye kya yaad rahe
ki hui sub.h kahan aur kahan raat hui
tiri duz-dida-nigahi ka ḳhayal aate hi
dil men ik raushni-e-kashf-e-hijabat hui
is qadar sahl kahan marhala-e-soz-o-gudaz
raat bhar sham.a ka jalna bhi koi baat hui
pas-e-adab-e-mohabbat ki ba-in raaz o niyaz
muddaton bad-e-saba se na koi baat hui
jis ki mahfil ko ‘ravish’ jannat-e-farda kahiye
kal usi ḳhusrav-e-ḳhuban se mulaqat hui
Leave a Reply