asnam-e-mal-o-zar ki parastish sikha ga.i
duniya mujhe bhi abid-e-duniya bana ga.i
vo sang-e-dil mazar-e-vafa par ba-nam-e-ishq
aa.i to mere naam ka patthar laga ga.i
mere liye hazar tabassum thi vo bahar
jo ansuon ki raah pe mujh ko laga ga.i
gauhar-farosh shabnami palkon ki chhanv men
kya aag thi jo ruuh ke andar sama ga.i
mere suḳhan ki daad bhi us ko hi dijiye
vo jis ki aarzu mujhe sha.ir bana ga.i
‘sahba’ vo raushni jo bahut mehrban thi
kyuun mere raste men andhere bichha ga.i
Leave a Reply