hathon men aaj ki shab mehndi lagaiyega
samjhe ye rang ham bhi kuchh rang laiyega
ye shokhiyan tumhari likkhi hui hain dil par
akhir kabhi to mere qaabu men aiyega
phir main bhi kuchh kahunga dekho zaban roko
phir munh chhupa ke mujh se aansu bahaiyega
zat-e-sharif ho tum main khuub janta huun
tufan aur koi mujh par uthaiyega
haan shama ka main gul huun naseh ki guftugu huun
badh jaunga jahan tak mujh ko ghataiyega
ummid-var baaqi kuchh aur rah gae hain
phir bhi naqab-e-gesu munh se hataiyega
be-vajh ye nahin hai andaz guftugu ka
phir kal ki tarah ai jaan baten sunaiyega
main huun mizaj-qatil lazim hai khauf mujh se
jhuti qasam nahin huun har-dam jo khaiyega
ye kyuun hai na-umidi dargah-e-kibriya se
jo kuchh ki aarzu hai vaisa hi paiyega
mushtaq ne to jaan di gul-gu libas kyuun ho
ye rang-e-nau-arusi kis ko dikhaiyega
dekho raqib aae dekho raqib aae
kya munh ab aap ka hai jo munh chhupaiyegaga
ham khuub jante hain ustadiyan tumhari
mahfil men baithe baithe ankhen milaiyega
akhir kuchh intiha bhi be-rahmiyon ki sahab
kahiye to ashiqon ko kab tak sataiyega
mumkin nahin jo niyyat badle tumhari ai jaan
kya qahr aaj ki shab ham par na laiyega
kuchh lahza aur thahro ta-ruh tan se nikle
aaegi aur aafat gar aap jaiyega
samjhe hue hain jo kuchh dil men bhare hue hai
kaahe ko aiyega kaahe ko aiyega
aao to jald aao dam-bhar ke baad ai jaan
mujh ko na paiyega mujh ko na paiyega
sun lijiyega jo kuchh muddat se aarzu hai
fursat ho gar mayassar dam-bhar ko aiyega
kuchh duur main nahin huun lazim hai yaad karni
manind-e-dil mujhe bhi pahlu men paiyega
thandi kabhi na hongi kya garmiyan tumhari
akhir ‘nasim’ ka dil kab tak jalaiyega