sab lahu jam gaya ubaal ke biich
kaun yaad aa gaya visal ke biich
ek vaqfa hai zindagi-bhar ka
zaḳhm ke aur indimal ke biich
aan baiTha hai ek andesha
guftugu aur arz-e-hal ke biich
taal deti hai jab kabhi vahshat
raqs karta huun main ḳhayal ke biich
kabhi matam miyan-e-raqs kiya
kabhi sajda kiya dhamal ke biich
ek parda hai be-sabati ka
a.ine aur tire jamal ke biich
ik baras ho gaya use dekhe
ik sadi aa ga.i hai saal ke biich
mere daman ko dhone vaala hai
ek aansu jo hai rumal ke bech
Leave a Reply