Shafiq Saleemi
gaanv rafta rafta bante jaate hain ab shahr
qarya qarya phail raha hai tanha.i ka zahr
mujh ko Dasta rahta hai bas har dam yahi ḳhayal
ek hi ruḳh par kyuun bahta hai dariya aThon pahr
kaun sa bhula-bisra gham tha jo aaya hai yaad
rah rah kar phir dil men uTThe dard ki miThi lahar
mera jiite rahna bhi to ban gaya ek azaab
lekin mera marna bhi to ho ja.ega qahr
lagta hai kuchh anhoni si hone vaali hai
darham-barham hone ko hai jaise nizam-e-dahr
Leave a Reply