Khwaja Ali Husain
avval avval ki javani men ubaal aaya tha
baad men ja ke kahin zabt-e-kamal aaya tha
mere vijdan ne bar-vaqt bataya tha mujhe
hijr ka ḳhvab mujhe vaqt-e-visal aaya tha
ku-ba-ku phail ga.i us ke badan ki ḳhushbu
saaf lagta hai vahi zohra-jamal aaya tha
ḳhud ko paane ke liye ḳhud men utar kar apne
bahr-o-bar haath ki chhalni men khangal aaya tha
vaqt ke jabr ki dahliz pe baiTha jis dam
gham ki tahrik se ḳhushiyon pe zaval aaya tha
ab to ahbab bhi dam bhar ko ThiThuk jaate hain
jab main aaya tha yahan kitna nihal aaya tha
‘abdi’ kaun bata.ega mire baad use
Dubte vaqt mujhe us ka ḳhayal aaya tha
Leave a Reply