Tawil Raaton Ki Khamushi Mein Meri Fughan Thak Ke So Gai Hai

Ahmad Rahi

tavil raton ki khamushi men miri fughan thak ke so gai hai

tumhari ankhon ne jo kahi thi vo dastan thak ke so gai hai

mire khayalon men aaj bhi khvab ahd-e-rafta ke jagte hain

tumhare pahlu men kahish-e-yad-e-pastan thak ke so gai hai

gila nahin tujh se zindagi ke vo nazariye hi badal gae hain

miri vafa vo tire taghaful ki nauha-khvan thak ke so gai hai

sahar ki ummid ab kise hai sahar ki ummid ho bhi kaise

ki ziist ummid-o-na-umidi ke darmiyan thak ke so gai hai

na jaane main kis udhed-bun men ulajh gaya huun ki mujh ko ‘rahi’

khabar nahin kuchh vo arzu-e-sukun kahan thak ke so gai hai