haidar-ali-aatish

Ghairat-E-Mahr Rashk-E-Mah Ho Tum

ghairat-e-mahr rashk-e-mah ho tum

khubsurat ho badshah ho tum

jis ne dekha tumhen vo mar hi gaya

husn se tegh-e-be-panah ho tum

kyun-kar ankhen na ham ko dikhlao

kaise khush-chashm khush-nigah ho tum

husn men aap ke hai shan-e-khuda

ishq-bazon ke sajda-gah ho tum

har libas aap ko hai zebinda

jama-zebon ke badshah ho tum

fauq hai saare khush-jamalon par

vo sitare jo hain to maah ho tum

ham se parda vahi hijab ka hai

kucha-gardon se ru-barah ho tum

kyuun mohabbat badhai thi tum se

ham gunahgar be-gunah ho tum

jo ki haqq-e-vafa baja laae

shahid allah hai gavah ho tum

hai tumhara khayal pesh-e-nazar

jis taraf jaaen sadd-e-rah ho tum

donon bande usi ke hain ‘atish’

khvah ham us men hoven khvah ho tum

More Poems

Leave a Comment