Poet
jo kisi par na hua ho vo sitam ho to kaho
ab nirala koi afsana-e-gham ho to kaho
rahnuma jab na mira naqsh-e-qadam ho to kaho
meri raftar kahin raah men kam ho to kaho
sharh-e-andoh-e-mohabbat pe tabassum kaisa
ye koi zaviya-e-lutf-o-karam ho to kaho
har jafa gham hai mire zarf ki pahna.i men
mere honTon pe kabhi zikr-e-sitam ho to kaho
main ne har zaḳhm-e-baharan ko chhupa rakkha hai
mujh se majruh gulistan ka bharam ho to kaho
un ki taḳhliq alag aur miri fikr juda
un ka mera koi andaz baham ho to kaho
likh raha hai koi pur-kaif ghazal aaj ‘nasir’
bad-numa lafz koi zer-e-qalam ho to kaho
Leave a Reply