Mere Badan Se Kabhi Aanch Is Tarah Aae

mire badan se kabhī aañch is tarah aa.e

lipaT ke mujh se mire saath vo bhī jal jaa.e

maiñ aag huuñ to mire paas koī kyuuñ baiThe

maiñ raakh huuñ to koī kyuuñ kuredne aa.e

bhare dayār meñ ab is ko kis tarah DhūñDeñ

havā chale to kahīñ bū-ham-nafas aa.e

ye raat aur rivāyāt kī ye zanjīreñ

galī ke moḌ se do lauTte hue saa.e

vahī badan vahī chehra vahī libās magar

koī kahāñ se ‘basāvan’ kā mū-qalam laa.e

koī to baat huī hai ajiib sī ‘rāhat’

ki aa.ina bhī na vo chhoḌe aur sharmā.e

Leave a Comment