Poet
rag-o-pai men bhara hai mere shor us ki mohabbat ka
namak-parvar vo huun main yaar ke husn-o-malahat ka
banane se mire bigḌa ye rang un ki tabi.at ka
mujhi se hai pari-zadon ko da.ave adamiyat ka
ḳharidari-e-jins-e-husn par raghbat dilata hai
bana hai shauq-e-dil dallal bazar-e-mohabbat ka
sada-e-ah hai mizrab-e-gham ki chheḌ se paida
dil-e-nalan naya parda hai qanun-e-mohabbat ka
jo vaqt-e-qatl us ke la.al-e-shirin ka paḌa partav
pilaya ab-e-tegh-e-yar ne sharbat shahadat ka
hua ye dil na jab mera to phir kya aur ka hoga
bharosa kijiyo tum bhi na aise be-muravvat ka
zamane ko to mere vaste in sab ne chhoḌa hai
na huun kis tarah main mamnun dard-o-ranj-o-mehnat ka
abas asudgan-e-ḳhak ko bad-ḳhvab karte ho
abhi se kyuun macha rakkha hai hangama qayamat ka
za.ifi men bashar lahv-o-la.ab ko tark karte hain
safedi mu-e-sar ki nuur hai kya chashm-e-ibrat ka
bahar-e-bagh-e-alam be-sabat aisi hai ai bulbul
guman hai ḳhanda-e-gul par sada-e-kus-e-rehlat ka
dabistan-e-azal men ustad-e-ishq ne mujh ko
sabaq pahle diya tha abjad-e-vab-e-mohabbat ka
sada yaan hillat-e-bint-e-anab ki aqd jaari hai
tariqa hai nirala pir-e-mai-kash ki tariqat ka
jo paaya mughbachon men tarz-e-e.ajaz-e-masiha.i
hua zahid bhi qaa.il pir-e-mai-kash ki karamat ka
subut-e-jurm ulfat kar ke maara us ke saude ne
tiri zulf-e-rasa darrah bani shar.a-e-mohabbat ka
na dekha muḌ ke bhi phir ahd-e-piri men javani ne
abas mazkur karte ho tum aise be-muravvat ka
vo bekas huun siva.e shabnam-e-giryan pas-e-murdan
diya rone men kis ne saath meri sham-e-turbat ka
ghubar-e-kina-o-bughz-o-hasad se paak hai ye dil
hamare aa.ine ne munh nahin dekha kudurat ka
karen kya rind mashrab iḳhtiyar ik maz.hab ai vaa.iz
nahin dil toḌna manzur haftad-o-do-millat ka
‘qalaq’ har vaqt ab hai samna taklif-e-piri ka
javani luuT kar sab le ga.i asbab rahat ka
Leave a Reply