ham-nashino kuchh nahin rakkha yahan par kuchh nahin
chhod do is ki havas duniya ke andar kuchh nahin
dar khula hi rahne do ghar se nikalte vaqt tum
kuchh agar hai to tumhari zaat hai ghar kuchh nahin
baaen men suraj rahe aur chand dahne haath men
dil agar raushan nahin to shobada-gar kuchh nahin
main sarapa raat bhi huun main sarapa subh bhi
mujh se kam-tar kuchh nahin aur mujh se bartar kuchh nahin
ik chamak ankhon men aa jaati hai us ko dekh kar
varna dil to muttafiq hai aap se, zar kuchh nahin
aaine se ro ke puchha jab kabhi main kaun huun
aina bola vahin fauran palat kar kuchh nahin
vaqt ne sab duur kar di hain miri khush-fahmiyan
ye mira mukhlis hai mujh ko is se badh kar kuchh nahin
Leave a Reply