tamam mo.ajaze saari shahadaten le kar
main aab o ḳhaak se guzra adavaten le kar
ḳhud apne harf ke sho.ale men jal ke lauTa huun
main ik safar pe gaya tha hikayaten le kar
kashan-kashan lab-e-sahil utar ga.i mujh men
udaas raat samundar ki vus.aten le kar
had-e-zaman-o-makan se guzar raha huun main
ḳhud apne hone na hone ki hairaten le kar
abhi to zaḳhm sile the ki asman se koi
miri taraf chala aaya jarahaten le kar
zamin ke logo suno hashr ab na uTThega
guzar gaya koi saari qayamaten le kar
akela shahr men phirta huun saara din ‘sabir’
main apne bichhḌe huon ki shabahaten le kar
Leave a Reply