Ye Mohabbat Jo Mohabbat Se Kamai Hui Hai

ye mohabbat jo mohabbat se kamai hui hai

aag siine men usi ne to lagai hui hai

ik vahi phuul mayassar na hua daman ko

jis ki khushbu meri rag rag men samai hui hai

jab bhi ankhon ne sajae hai tumhare sapne

zehn aur dil men bahut der ladai hui hai

dil ki chaukhat pe jala rakkhe hai ankhon ne charagh

kis ki aamad ki abhi aas lagai hui hai

us ki yaado se munavvar hai mire dil ka jahan

ansoon se meri ankhon ki safai hui hai

ai mohabbat tere chehre pe udasi kyuun hai

jaise ek tu hi zamane ki satai hui hai

jis ki kirnon se jhulas jaate hain raushan chehre

chandni bhi usi suraj ki banai hui hai

Leave a Comment