vo muntazir hain hamare to ham kisi ke hain
alamaton men ye asar khud-kushi ke hain
pas-e-murad bahut khvab hain nigahon men
samundaron men jazire ye raushni ke hain
main apne aap ko dushman ke sarf men de duun
ye mashvare to miri jaan vapsi ke hain
hujum-e-aks hai aur aina-sifat huun main
so mere jitne bhi dukh hain vo agahi ke hain
kisi qaba ko mayassar hai fakhera hona
kisi libas men paivand muflisi ke hain
main us se dukh ke bhi us ko duaen deti huun
ajiib rang mohabbat men dushmani ke hain
main jab bhi chahun jabhi us se guftugu kar luun
miri ghazal pe ye ehsan shairi ke hain
jo shahr-e-sang men shisha-mizaj hain ‘ruhi’
vo zimmedar khud apni shikastagi ke hain