ummid ka baab likh raha huun
patthar pe gulab likh raha huun
vo shahr to ḳhvab ho chuka hai
jis shahr ke ḳhvab likh raha huun
ashkon men piro ke us ki yaden
paani pe kitab likh raha huun
vo chehra to a.ina-numa hai
main jis ko hijab likh raha huun
sahra men vafur-e-tishnagi se
saa.e ko sahab likh raha huun
lamhon ke saval se gurezan
sadiyon ka javab likh raha huun
sab us ke karam ki dastanen
main zer-e-itab likh raha huun
Leave a Reply