roz-o-shab ka nisab lagti hai
zindagi ik kitab lagti hai
dosto kya tumhen miri surat
ḳhasta-hal-o-ḳharab lagti hai
ishq men umr jo guzari hai
ab sunahra sa ḳhvab lagti hai
kya kaha vo sin-e-bulughat men
aur bhi pur-shabab lagti hai
ye tiri aankh men chhupi masti
mujh ko mauj-e-sharab lagti hai
giḌgiḌa kar dua jo mangi thi
kya tumhen mustajab lagti hai
jis men us ki na yaad ho ‘shafi’
aisi saa.at azaab lagti hai
Leave a Reply