nahin nigah men manzil to justuju hi sahi
nahin visal mayassar to aarzu hi sahi
na tan men khuun faraham na ashk ankhon men
namaz-e-shauq to vajib hai be-vazu hi sahi
kisi tarah to jame bazm mai-kade vaalo
nahin jo bada-o-saghar to hav-hu hi sahi
gar intizar kathin hai to jab talak ai dil
kisi ke vada-e-farda ki guftugu hi sahi
dayar-e-ghair men mahram agar nahin koi
to ‘faiz’ zikr-e-vatan apne ru-ba-ru hi sahi
Leave a Reply