dar-o-divar se Dar lag raha tha
tira ghar bhi mira ghar lag raha tha
usi ne sab se pahle haar maani
vahi sab se dilavar lag raha tha
jise mahtab kahta tha zamana
tire kuche ka patthar lag raha tha
jagah ab chhoḌ duun beTe ki ḳhatir
vo kal mere barabar lag raha tha
ḳhabar kya thi bagulon ka hai maskan
pare se to samundar lag raha tha
chhalakti thi ghazal har zaviye se
tira paikar suḳhnavar lag raha tha
Thaharta kaun ik mere alava
vahan to daav par sar lag raha tha
tiri yadon ki rut aa.i hui thi
ye sahra mor ka par lag raha tha
mire divar-o-dar bhi kaghzi the
ghaTa men bhi samundar lag raha tha
Leave a Reply