naya hai shahr na.e aasre talash karun
tu kho gaya hai kahan ab tujhe talash karun
jo dasht men bhi jalate the fasl-e-gul ke charagh
main shahr men bhi vahi aable talash karun
tu aks hai to kabhi meri chashm-e-tar men utar
tire liye main kahan aa.ine talash karun
tujhe havas ki avargi ka ilm kahan
kabhi main tujh ko tire samne talash karun
ghazal kahun kabhi saada se ḳhat likhun us ko
udaas dil ke liye mashghale talash karun
mire vajud se shayad mile suragh tira
kabhi main ḳhud ko tire vaste talash karun
main chup rahun kabhi be-vaj.h hans paḌun ‘mohsin’
use ganva ke ajab hausle talash karun
Leave a Reply