Poet
lab pe ik naam jab aata hai to ro lete hain
koi ji-bhar ke rulata hai to ro lete hain
chandni-rat ki mahki hui tanha.i men
saz-e-gham par koi gaata hai to ro lete hain
nur-o-nik.hat ki fazaon ka dil-avez saman
dil men jab aag lagata hai to ro lete hain
aaj bhi hadsa-e-dard-e-mohabbat ki qasam
pyaar jab koi baḌhata hai to ro lete hain
arzuon ki ujaḌi hui mahfil men kahin
sham-e-dil koi jalata hai to ro lete hain
koi anjan masiha koi gham ka sathi
qissa-e-dard sunata hai to ro lete hain
dil ki galiyon se tasavvur ki hasin vaadi se
jab koi ruuTh ke jaata hai to ro lete hain
jaane kis zaḳhm-e-mohabbat ka ḳhayal aata hai
pyaar se koi bulata hai to ro lete hain
ab bhi ummid ke so.e hue zaḳhmon ko ‘ra.is’
jab koi aa ke jagata hai to ro lete hain
Leave a Reply