Ismail Merathi
ittifaqan ek pauda aur ghaas
baagh men donon khade hain paas paas
ghaas kahti hai ki ai mere rafiq
kya anokha is jahan ka hai tariq
hai hamari aur tumhari ek zaat
ek qudarat se hai donon ki hayat
mitti aur paani hava aur raushni
vaste donon ke yaksan hai bani
tujh pe lekin hai inayat ki nazar
phenk dete hain mujhe jad khod kar
sar uthane ki mujhe fursat nahin
aur hava khane ki bhi rukhsat nahin
kaun deta hai mujhe yaan phailne
kha liya ghode gadhe ya bail ne
tujh pe munh daale jo koi janvar
us ki li jaati hai dande se khabar
ole paale se bachate hain tujhe
kya hi izzat se badhate hain tujhe
chahte hain tujh ko sab karte hain pyaar
kuchh pata us ka bata ai dost-dar
us se paude ne kaha yuun sar hila
ghaas sab sachcha hai tera ye gila
mujh men aur tujh men nahin kuchh bhi tamiz
sirf saaya aur meva hai aziiz
faeda ik roz mujh se paenge
saae men baithenge aur phal khaenge
hai yahan izzat ka sahra us ke sar
jis se pahunche nafa sab ko besh-tar
Leave a Reply