Anwar Anjum
dhuup ho ga.e saa.e jal ga.e shajar jaise
jam ga.i hai dharti par ab ke dopahar jaise
ziist ke ḳharabe men ik siyah ghar dil ka
aur dil men yaad us ki raushni ka dar jaise
kaise kaise hangame ghere rakhte the din-rat
lag ga.i nigahon ko apni hi nazar jaise
ya to aane se pahle ghar ka puchhte ahval
aa ga.e to ab kiije ho guzar-basar jaise
aise takta rahta huun us gali ke logon ko
lene aa.ega koi meri bhi ḳhabar jaise
muddaton main guzra tha us ke shahr se lekin
sab makan lagte the mujh ko us ke ghar jaise
naqsh-gah-e-hasti men dekhi apni bhi tasvir
ek kaghaz-e-sada ansuon se tar jaise
chahti hai ab vahshat duur tak bayabani
kaTne ko aate hain ghar ke bam-o-dar jaise
mujh se kya sahe jaate un ki bazm ke adab
ashk mangte the vo ashk bhi guhar jaise
main bhi kitna saada huun rahguzar pe baiTha huun
rok lega vo paanv mujh ko dekh kar jaise
meri ḳhvahishen ‘anjum’ jaise nachti pariyan
mera saara mustaqbil ḳhvab ka nagar jaise
Leave a Reply