apne va.adon ko faramosh na kar dena tha
saz-e-altaf ko ḳhamosh na kar dena tha
apni nazron se agar mujh ko kiya tha ojhal
apne dil se to faramosh na kar dena tha
nahin aata tha agar hosh men laana tum ko
kisi kambaḳht ko behosh na kar dena tha
har-nafas maut ke qadmon ki sada sunne ko
zindagi ko hama-tan-gosh na kar dena tha
ansuon men faqat ab mujh ko nazar aate ho
is tarah to mujhe gham-kosh na kar dena tha
na uThana tha dar-e-mai-kada-e-naz se ab
varna pahle mujhe mai-nosh na kar dena tha
hashr bhi ya to bahisht-afrin karna tha mira
ya miri qabr ko gul-posh na kar dena tha
is tarah zahmat-e-farda ko baḌhane ke liye
mujh ko ḳhamyaza-kash-e-dosh na kar dena tha
aankh men dekh kar aansu mujhe rashk aata hai
itna viran to aghosh na kar dena tha
daftar-e-naz pe kuchh baar na tha is ka niyaz
apne ‘bismil’ ko subuk-dosh na kar dena tha
Leave a Reply