Bakhsh Layalpuri
asiran-e-havadis ki giran-jani nahin jaati
jahan se ḳhun-e-insani ki arzani nahin jaati
darogh-e-maslahat ke dekh kar asar chehron par
haqiqat-ashna ankhon ki hairani nahin jaati
nishan-e-khusravi to miT ga.e hain lauh-e-alam se
kulah-e-khusravi se bu-e-sultani nahin jaati
andhera is qadar hai shahr par chhaya siyasat ka
kisi bhi shaḳhs ki ab shakl pahchani nahin jaati
zamana karbala ka naam sun kar kaanp uThta hai
abhi tak ḳhun-e-shabbiri ki jaulani nahin jaati
fuzun-tar aur hote ja rahe hain chaak daman ke
rafu-gar se hamari chak-damani nahin jaati
ye maana raushni ko pi ga.i zulmat jihalat ki
magar is zarra-e-ḳhaki ki tabani nahin jaati
Leave a Reply