bujhne na do charagh-e-vafa jagte raho
pagal hui hai ab ke hava jagte raho
sajdon men hai ḳhulus to phir chandni ke saath
utrega anganon men ḳhuda jagte raho
alfaz so na jaa.en kitabon ko oḌh kar
danishvaran-e-qaum zara jagte raho
kaisa ajiib shor hai basti men aj-kal
har ghar se aa rahi hai sada jagte raho
pahle to us ki yaad ne sone nahin diya
phir us ki ahaTon ne kaha jagte raho
phulon men ḳhushbuon men sitaron men chand men
kholega koi band-e-qaba jagte raho
tum bhi suno ki shahr-e-ḳhamoshan men raat din
sannaTe de rahe hain sada jagte raho
jab bhi qalam ko mere kabhi aa.iin jhapkiyan
ankhon ne ansuon se likha jagte raho
‘mansur’ ratjage to muqaddar hain aap ka
jab tak jale suḳhan ka diya jagte raho
Leave a Reply