zaban ko apni gunahgar karne vaala huun
ḳhamosh rah ke hi iz.har karne vaala huun
main karne vaala huun har ḳhair-ḳhvah ko mayus
abhi main jurm ka iqrar karne vaala huun
chhupani chahiye jo baat mujh ko duniya se
usi ka aaj main iz.har karne vaala huun
vo jis ke ba.ad mujhe kuchh nahin Dara.ega
vo inkishaf sar-e-dar karne vaala huun
machi hai khalbali aisi nazar ke angan men
ki jaise main tira didar karne vaala huun
haya ke rang se gulzar ho gaya chehra
pata hai us ko ki main pyaar karne vaala huun
Leave a Reply