hava ke zor se jab badban phaTne lage
musafir apne ḳhudaon ke naam raTne lage
hamare sinon pe ab bhi bahut jagah hai janab
magar tumhare hi tarkash men tiir ghaTne lage
yazid-e-vaqt hua jis ghaḌi se taḳht-nashin
hamare naam ke ḳhanjar har ik men baTne lage
makan ham ne bana to liya kinare par
na aisa ho ke kinare ki ret kaTne lage
tumhari ḳhushiyan bhi meri hain gham bhi mere hain
ye mal-e-muft nahin jo har ik jhapaTne lage
ise charagh ka rutba kahun ya ro.ab kahun
hava ke par miri dahliz par simaTne lage
ye kis ne phenka hai patthar dhadhakte sho.alon par
sharare ho ke juda aag se uchaTne lage
bahut tha zo.am jinhen apni shah-savari par
gire kuchh aise ke siine ke bal ghisaTne lage
tere mahal ke hisaron ki iinT jhaḌne lagin
na aisa ho tera shahi vaqar ghaTne lage
hue hain shahr-badar ham magar ḳhuda na kare
makan dhansne lagen aur zamin palaTne lage
‘navaz’ ham hi the jo rasta nahin badla
vo zalzale the ke dariya bhi rah se ha.Tne lage
Leave a Reply