guman tak men na tha mahv-e-yas kar dega
vo yuun milega ki mujh ko udaas kar dega
karam karega mire haal par magar pahle
shararatan vo mujhe gham-shanas kar dega
shaguftagi-e-chaman par bahut ghurur na kar
ḳhizan ka daur tujhe bad-havas kar dega
gaya vo daur ki jab ḳhaar bhi mahakte the
ye daur vo hai jo phulon ko naas kar dega
vo hadsa jo abhi mere saath guzra hai
sunoge tum to tumhen bhi udaas kar dega
use ḳhabar ki mire donon haath ḳhali hain
mujhe yaqin hai vo iltimas kar dega
Leave a Reply