hasti ko tiri bas hai miyan gul ki isharat
kaafi hai mire naale ko bulbul ki isharat
fatva talab ai yaar na qaazi se karun main
tauba-shikani ko hai miri mul ki isharat
mil baith meri ankhon men hai saat-e-nek aaj
ye chashm tarazu hain tire tul ki isharat
hai bais-e-jamiyyat-e-dil ek jahan ki
ai shokh pareshani-e-kakul ki isharat
taqva ke nahin baar se qad kham tira ai shaikh
ik khalq men mashhur hai is pul ki isharat
yaad aae tiri zulf na mujh ko jo chaman men
de taab mire dil ko na sumbul ki isharat
ushshaq ko tujh chashm ke hajat nahin mai ki
behosh kare ‘sauda’ ko qulqul ki isharat
Leave a Reply