main ne kal ḳhvab men a.inda ko chalte dekha
rizq aur ishq ko ik ghar se nikalte dekha
raushni DhunD ke laana koi mushkil to na tha
lekin is dauḌ men har shaḳhs ko jalte dekha
ek ḳhush-fahm ko rote hue dekha main ne
ek be-rahm ko andar se pighalte dekha
roz palkon pe ga.i raat ko raushan rakkha
roz ankhon men ga.e din ko machalte dekha
sub.h ko tang kiya ḳhud pe zarurat ka hisar
shaam ko phir isi mushkil se nikalte dekha
ek hi samt men kab tak koi chal sakta hai
haan kisi ne mujhe rasta na badalte dekha
‘azm’ is shahr men ab aisi koi aankh nahin
girne vaale ko yahan jis ne sambhalte dekha
Leave a Reply