apne qadmon hi ki avaz se chaunka hota
yuun mire paas se ho kar koi guzra hota
chandni se bhi sulag uThta hai virana-e-jan
ye agar jante suraj hi ko chaha hota
zindagi ḳhvab-e-pareshan hai bahar ek ḳhayal
in ko milne se bahut pahle ye socha hota
dopahar guzri magar dhuup ka aalam hai vahi
koi saaya kisi divar se utra hota
ret uḌ uḌ ke havaon men chali aati hai
shahr-e-arman sar-e-sahra na basaya hota
aarzu umr-e-gurezan to nahin tum to nahin
ye sarakta hua lamha kahin Thahra hota
pichhe pichhe koi saaya sa chala aata tha
haae vo kaun tha muḌ kar use dekha hota
tujh se yak go na ta.alluq mujhe ik umr se tha
zindagi tu ne hi baḌh kar mujhe roka hota
jaane kya soch ke logon ne bujhae hain charagh
raat kaTti to sahar hoti ujala hota
apne daman ko jala kar main charaghan karta
agar is raakh men ‘aḳhtar’ koi sho.ala hota
Leave a Reply