Bekal Utsahi
to pahle mera hi hal-e-tabah likh liije
phir apne aap ko aalam panah likh liije
kitab-e-sahra men zikr aa.e jab samundar ka
miri hayat kisi ki nigah likh liije
diyon ke qatl pe suraj ki har kiran chup hai
is ehtiyat ko jashn-e-siyah likh liije
labon pe amn ke naghme dilon men jang ki aag
shikast-e-azm ba-nam-e-sipah likh liije
vo mere qatl ka mulzim hai log kahte hain
vo chhuT sake to mujhe bhi gavah likh liije
main apne ghar ki tabahi sambhal lunga magar
zamane bhar ka mujhe sarbarah likh liije
ḳhata.en itni hain ‘bekal’ mujhe nahin malum
yahi saza hai mira har gunah likh liije
Leave a Reply