is daur ne baḳhshe hain duniya ko ajab tohfe
ghabra.e hue paikar ukta.e hue chehre
kuchh dard ke maare hain kuchh naaz ke hain paale
kuchh log hain ham jaise kuchh log hain tum jaise
har gaanv suhana ho har shahr chamak uTThe
dil ki ye tamanna hai puuri ho magar kaise
biphri hui duniya ne patthar to bahut phenke
ye shish-mahal lekin ai dost kahan TuuTe
yunhi to nahin bahti ye dhaar lahu jaisi
is baar fazaon se ḳhanjar hi bahut barse
kyuun aag bhaḌak uTThi sha.er ke ḳhayalon ki
ye raaz ki baten hain nadan tu kya jaane
sau baar suna ham ne sau baar hansi aa.i
vo kahte hain patthar ko ham mom bana denge
phir gosh-e-tasavvur men abba ki sada aa.i
phir us ne dar-e-dil pe avaz di chupke se
is ḳhaak pe bikhra hai ik phuul hamara bhi
jab bad-e-saba aa.e kuchh der yahan Thahre
afsana-numa koi rudad nahin meri
jhanka na kabhi main ne ḳhvabon ke dariche se
mushkil hai ye ‘dauran’ is bhiiḌ ko samjhana
muḌ muḌ ke jo rahzan se manzil ka pata puchhe
Leave a Reply