Abdul Majeed Salik
vo hai hairat-faza-e-chashm-e-maani sab nazaron men
tadap bijli men us ki iztirab us ka sitaron men
madad ai iztirab-e-shauq tu jan-e-tamanna hai
nikal ai sabr tera kaam kya hai be-qararon men
ye kis ka naam le kar jaan di bimar-e-ulfat ne
ye kis zalim ka charcha rah gaya timar-daron men
zara si chhed bhi kaafi hai mizrab-e-mohabbat ki
ki naghme muztarib hain barbat-e-hasti ke taron men
kahan ka shaghl ab to daur hai khun-naba-e-gham ka
vahi qismat men thi jo pi chuke agli baharon men
Leave a Reply