Mashkoor Mamnoon Qannauji
vo hamen aur ham unhen bas duur se dekha kiye
umr-bhar ik dusre ko ham yunhi chaha kiye
us ne va.ada toḌ Daala ye use haq tha magar
kis qadar ma.asum the ham rasta dekha kiye
pa liya ahl-e-junun ne phir shahadat ka maqam
aql vaale maghfirat ki hi dua manga kiye
tu ne meri samt na dekha palaT ke ek baar
jaane vaale ham to tujh ko duur tak dekha kiye
baanT di allah ne vaqt-e-sahar sab ne.amaten
ham se ghafil dhuup ke chaḌhne talak soya kiye
kya bata.un doston apni ye dil ki dastan
ham kisi ki dil-lagi ko chahaten samjha kiye
Leave a Reply