dida-o-danista dhoka kha ga.e
ham fareb-e-zindagi men aa ga.e
jab hujum-e-shauq se ghabra ga.e
kho ga.e ḳhud aur tum ko pa ga.e
chain bhi lene nahin dete mujhe
main abhi bhula tha phir yaad aa ga.e
main kahan ja.un nazar ko kya karun
aap to saari faza par chha ga.e
dil hi dil men uf vo dard-e-na-gahan
ankhon hi ankhon men kuchh samjha ga.e
ruḳh se anchal bhi na sarka tha abhi
nichi nazren ho ga.iin sharma ga.e
uf ye ghunchon ka tabassum ye bahar
haif agar ye ghunche kal murjha ga.e
jis qadar ghunche khile the nau-ba-nau
meri ankhon se lahu barsa ga.e
puchhte kya ho in ashkon ka sabab
vaqi.at-e-rafta phir yaad aa ga.e
ab to shor apna fasana ḳhatm kar
un ki ankhon men bhi aansu aa ga.e
Leave a Reply