Habib Jalib
kahin aah ban ke lab par tira naam aa na jaa.e
tujhe bevafa kahun main vo maqam aa na jaa.e
zara zulf ko sambhalo mira dil dhaḌak raha hai
koi aur ta.ir-e-dil tah-e-dam aa na jaa.e
jise sun ke TuuT jaa.e mira aarzu bhara dil
tiri anjuman se mujh ko vo payam aa na jaa.e
vo jo manzilon pe la kar kisi ham-safar ko luTen
unhin rahzanon men tera kahin naam aa na jaa.e
isi fikr men hain ghaltan ye nizam-e-zar ke bande
jo tamam-e-zindagi hai vo nizam aa na jaa.e
ye mah o nujum hans len mire ansuon pe ‘jalib’
mira mahtab jab tak lab-e-bam aa na jaa.e
Leave a Reply