ye jo baḌhti hui juda.i hai
shayad aghaz-e-be-vafa.i hai
tu na badnam ho usi ḳhatir
saari duniya se ashna.i hai
kis qadar kashmakash ke ba.ad khula
ishq hi ishq se riha.i hai
sham-e-gham main to chand huun us ka
mere ghar kya samajh ke aa.i hai
zaḳhm-e-dil be-hijab ho ke ubhar
koi taqrib-e-ru-numa.i hai
uThta jaata hai hauslon ka bharam
ik sahara shikasta-pa.i hai
jaan ‘ali’ nahin paḌi asan
maut ro ro ke muskura.i hai
Leave a Reply