Poet
vaqif-e-hal nasim-e-sahari hai ki nahin
god phulon se gulsitan ki bhari hai ki nahin
ba.ad men sochna kis dar se hue the daḳhil
pahle dekho ye vahi bara-dari hai ki nahin
qafila luT bhi chuka rah-numa soch men hai
mujh pe ilzam ghalat rahbari hai ki nahin
mera dil toḌne vaalo ye batao duniya
aaj bhi kar–gah-e-shisha-gari hai ki nahin
sirf ye dekhne aate hain hava ke jhonke
shaḳh har zaḳhm-e-tamanna ki hari hai ki nahin
vo charagh-e-shab-e-aḳhir huun ki ab sochta huun
mere daman men koi ḳhush-ḳhabari hai ki nahin
‘nashtar’ azad hain azadi ka ye daur magar
daur-e-azadi-e-be-bal-o-pari hai ki nahin
Leave a Reply