Aziz Hamid Madni
zanjir-e-pa se ahan-e-shamshir hai talab
shayad tiri gali men na pahunche ye shor ab
aḳhir jhalak uThi vo gareban ke chaak se
jis intizar-e-sub.h men guzri thi meri shab
yaad aa.i dil ko tere dar-e-nim-va ki raat
rukne lage qadam jo sar-e-rah be-sabab
ye shan-e-dilbari hai ki vo jab bhi mil gaya
paaya mizaj-e-dost ko asuda-e-tarab
is taza-dam hava men mire mah-e-nim-mah
us baam se juda na kabhi ho tulu-e-shab
ankhen to khol daur-e-taghayyur hai ham-nashin
kuchh khiḌkiyan to khol ga.i hai hava-e-shab
chalne ko hai hava-e-gul-o-lala ki jagah
ik naqb si lagati hui sarsar-e-aqab
ankhon pe ek jadu-e-zulmat sa chha gaya
haul-e-afrin hayyulon ke jumbish men aa.e lab
kazib sahafaton ki bujhi raakh ke tale
jhulsa hua milega varaq-dar-varaq adab
duniya badal ga.i hai hisab aur ho ga.e
ramz-e-taghayyur-e-ruḳh-e-alam hue hain sab
sadiyon men ja ke banta hai aḳhir mizaj-e-dahr
‘madni’ koi taghayyur-e-alam hai be-sabab
Leave a Reply