Sultan Rashk
jo nazar aata nahin divar men dar aur hai
in sitam-garon ke pichhe ik sitamgar aur hai
jo nazar aata nahin raste ka patthar aur hai
main nahin huun mere andar ek ḳhud-sar aur hai
in fazaon men magar mera guzar mumkin nahin
meri manzil aur hai mera muqaddar aur hai
ham hain tufan-e-havadis men hamen malum hai
tum samajh sakte nahin sahil ka manzar aur hai
bojh teri bevafa.i ka uTha leta magar
ik tamanna tujh se baḌh kar dil ke andar aur hai
kuchh ta.alluq hi nahin jis ka mire halat se
mere mohsin tera ik ehsan mujh par aur hai
aap se mil kar mujhe mahsus ye hone laga
ye mira paikar nahin hai mera paikar aur hai
meri barbadi ka baa.is sirf nadari nahin
ek saman-e-aziyyat is se baḌh kar aur hai
raushni pahle bhi hoti thi magar ‘sultan-rashk’
aftab-e-subah-e-azadi ka manzar aur hai
Leave a Reply