naghma-dar-jan raqs barpa khanda-bar-lab
dil tamannaon ke be-payan alaav ke qarib
dil mire sahra-navard-e-pir dil
reg ke dil-shad shahri reg tu
aur reg hi teri talab
reg ki nikhat tire paikar men teri jaan men hai
reg subh-e-id ke manind zartab-o-jalil
reg sadiyon ka jamal
jashn-e-adam par bichhad kar milne valon ka visal
shauq ke lamhat ke manind azad-o-azim
reg naghma-zan
ki zarre reg-zaron ki vo pazeb-e-qadim
jis pe pad sakta nahin dast-e-laim
reg-e-sahra zar-gari ki ek ki lahron se duur
chashma-e-makr-o-riya shahron se duur
reg shab-bedar hai sunti hai har jabir ki chaap
reg shab-bedar hai nigaran hai manind-e-naqib
dekhti hai saya-e-amir ki chaap
reg har ayyar gharat-gar ki maut
reg istibdad ke tughyan ke shor-o-shar ki maut
reg jab uthti hai ud jaati hai har fateh ki niind
reg ke nezon se zakhmi sab shahanshahon ke khvab
reg ai sahra ki reg
mujh ko apne jagte zarron ke khvabon ki
nai taabir de
reg ke zarron ubharti subh tum
aao sahra ki hadon tak aa gaya roz-e-tarab
dil mire sahra-navard-e-pir dil
aa chuum reg
hai khayalon ke pari-zadon se bhi maasum reg
reg-e-raqsan mah-o-sal nuur tak raqsan rahe
us ka abresham mulaem narm-khu khandan rahe
dil mire sahra-navard-e-pir dil
ye tamannaon ka be-payan alaav
raah gum kar duun ki mashal is ke lab par aao aao
tere maazi ke khazaf rezon se jaagi hai ye aag
aag ki qurmuz zaban par imbisat-e-nau ke raag
dil mire sahra-navard-e-pir dil
sargirani ki shab-e-rafta se jaag
kuchh sharar aghosh sarsar men hain gum
aur kuchh ziina ba ziina shoalon ke minar par chadhte hue
aur kuchh tah men alaav ki abhi
muztarib lekin muzabzab tifl-e-kam-sin ki tarah
aag ziina aag rangon ka khazina
aag un lazzat ka sar-chashma hai
jis se leta hai ghiza ushshaq ke dil ka tapak
chob-e-khushk angur us ki mai hai aag
sarsarati hai ragon men iid ke din ki tarah
aag kahin yaad se utri hui sadiyon ki ye afsana-khvan
aane vaale qarnaha ki dastanen lab pe hain
dil mira sahra-navard-e-pir dil sun kar javan
aag azadi ka dil-shadi ka naam
aag paidaish ka afzaish ka naam
aag ke phulon men nasrin yasman sumbul shafiq-o-nastaran
aag araish ka zebaish ka naam
aag vo taqdis dhul jaate hain jis se sab gunah
aag insanon ki pahli saans ke manind ik aisa karam
umr ka ik tuul bhi jis ka nahin kaafi javab
ye tamannaon ka be-payan alaav gar na ho
is laq-o-daq men nikal aaen kahin se bhediye
is alaav ko sada raushan rakho
reg-e-sahra ko basharat ho ki zinda hai alaav
bhediyon ki chaap tak aati nahin
aag se sahra ka rishta hai qadim
aag se sahra ke tedhe rengne vaale
girah-alud zholida darakht
jagte hain naghma-dar-jan raqs barpa khanda-bar-lab
aur mana lete hain tanhai men jashn-e-mahtab
un ki shakhen ghair-marai tabl ki avaz par deti hain taal
bikH-o-bun se aane lagti hai khudavandi jalajil ki sada
aag se sahra ka rishta hai qadim
rahravon sahra-navardon ke liye hai rahnuma
karvanon ka sahara bhi hai aag
aur sahraon ki tanhai ko kam karti hai aag
aag ke charon taraf pashmina-o-dastar men lipte hue
afsana-go
jaise gird-e-chashm mizhgan ka hujum
un ke hairat-nak dilkash tajrabon se
jab damak uthti hai ret
zarra zarra bajne lagta hai misal-e-saz-e-jan
gosh-bar-avaz rahte hain darakht
aur hans dete hain apni arifana be-niyazi se kabhi
ye tamannaon ka be-payan alaav gar na ho
reg apni khalvat-e-be-nur-o-khud-bin men rahe
apni yaktai ki tahsin men rahe
is alaav ko sada raushan rakho
ye tamannaon ka be-payan alaav gar na ho
asia africa pahnai ka naam
be-kar pahnai ka naam
europe aur america darai ka naam
takrar-e-darai ka naam
mera dil sahra-navard-e-pir dil
jaag utha hai mashriq-o-maghrib ki aisi yak-dili
ke karvanon ka naya ruuya liye
yak-dili aisi ki hogi fahm-e-insan se vara
yak-dili aisi ki ham sab kah uthen
is qadar ujlat na kar
izhdiham-e-gul na ban
kah uthen ham
tu gham-e-kul to na thi
ab lazzat-e-kul bhi na ban
roz-e-asaish ki bedardi na ban
yak-dili ban aisa sannata na ban
jis men tabistan ki dopahron ki
be-hasil kasalat ke siva kuchh bhi na ho
is jafa-gar yak-dili ke karvan yuun aenge
dast-e-jadu-gar se jaise phuut nikle hon tilism
ishq-e-hasil-khez se ya zor-e-paidai se jaise na-gahan
khul gae hon mashriq-o-maghrib ke jism
jism sadiyon ke aqiim
karvan farkhanda-pai aur un ka baar
kiisa kiisa takht-e-jam aur taj-e-kai
kuuza kuuza fard ki satvat ki mai
jaama jaama roz-o-shab mehnat ka khai
naghma naghma hurriyat ki garm lai
saliko firoz-bakhto aane vaale qaflo
shahr se lautoge tum to paoge
ret ke sarhad pe jo ruh-e-abad khvabida thi
jaag uthi hai shikva-ha-e-nai se vo
ret ki tah men jo sharmili sahar roida thi
jaag uthi hai hurriyat ki lai se vo
itni doshiza thi itni mard-e-na-dida thi subh
puchh sakte the na us ki umr ham
dard se hansti na thi
zarron ki raanai pe bhi hansti na thi
ek mahjubana be-khabari men hans deti thi subh
ab manati hai vo sahra ka jalal
jaise izz-o-jal ke paanv ki yahi mehrab ho
zer-e-mehrab aa gai ho us ko bedari ki raat
khud janab-e-izz-o-jal se jaise umid-e-zafaf
saare na-karda gunah is ke muaaf
subh-e-sahra shad-bad
ai urus-e-izz-o-jal farkhanda ro tabinda kho
tu ik aise hujra-e-shab se nikal kar aai hai
dast-e-qatil ne bahaya tha jahan har sej par
sainkadon taron ka rakhshanda lahu phulon ke paas
subh-e-sahra sar mire zaanu pe rakh kar dastan
un tamanna ke shahidon ki na kah
un ki nima-ras umangon arzuon ki na kah
jin se milne ka koi imkan nahin
shahd tera jin ko nashsh-e-jan nahin
aaj bhi kuchh duur is sahra ke paar
dev ki divar ke niche nasim
roz-o-shab chalti hai mubham khauf se sahmi hui
jis tarah shahron ki rahon par yatim
naghma-bar-lab taaki un ki jaan ka sannata ho duur
aaj bhi is reg ke zarron men hain
aise zarre aap hi apne ghanim
aaj bhi is aag ke shoalon men hain
vo sharar jo us ki tah men par-burida rah gae
misl-e-harf na-shunida rah gae
subh-e-sahra ai urus-e-izz-o-jal
aa ki un ki dastan dohraen ham
un ki izzat un ki azmat gaaen ham
subh ret aur aag ham sab ka jalal
yak-dili ke karvan un ka jamal
aao
is tahlil ke halqe men ham mil jaaen
aao
shad-bagh apni tamannaon ka be-payan alaav
Leave a Reply