Fana Nizami Kanpuri
dil se agar kabhi tira arman ja.ega
ghar ko laga ke aag ye mehman ja.ega
sab honge us se apne ta.aruf ki fikr men
mujh ko mire sukut se pahchan ja.ega
is kufr-e-ishq se mujhe kyuun rokte ho tum
iman vaalo mera hi iman ja.ega
aaj us se main ne shikva kiya tha shararatan
kis ko ḳhabar thi itna bura maan ja.ega
ab is maqam par hain miri be-qarariyan
samjhane vaala ho ke pasheman ja.ega
duniya pe aisa vaqt paḌega ki ek din
insan ki talash men insan ja.ega
Leave a Reply