Nargis Pe to Ilzam Laga Be-Basari Ka

Hafeez Hoshiarpuri

nargis pe to ilzam laga be-basari ka

arbab-e-gulistan pe nahin kam-nazari ka

taufiq-e-rifaqat nahin un ko sar-e-manzil

raste men jinhen paas raha ham-safari ka

ab ḳhanqah o madrasa o mai-kada hain ek

ik silsila hai qafila-e-be-ḳhabari ka

har naqsh hai a.ina-e-nairang-e-tamasha

duniya hai ki hasil miri hairan-nazari ka

ab farsh se ta-arsh zabun-hal hai fitrat

ik ma.arka dar-pesh hai azm-e-bashari ka

kab milti hai ye daulat-e-bedar kisi ko

aur main huun ki rona hai isi dida-vari ka

be-vasta-e-ishq bhi rang-e-ruḳh-e-parvez

unvan hai farhad ki ḳhunin-jigari ka

aḳhir tire dar pe mujhe le aa.i mohabbat

dekha na gaya haal miri dar-badari ka

dil men ho faqat tum hi tum ankhon pe na jaao

ankhon ko to hai rog pareshan-nazari ka

be-pairvi-e-‘mir’ ‘hafiz’ apni ravish hai

ham par koi ilzam nahin kam-hunari ka