jis din tum aa ke ham se ham-aghosh ho gae
shikve jo dil men the so faramosh ho gae
saaqi nahin hai saghar-e-mai ki hamen talab
ankhen hi teri dekh ke behosh ho gae
sunne ko husn-e-yar ki khubi ba-rang-e-gul
aaza mire badan ke sabhi gosh ho gae
karte the apne husn ki tarif gul-rukhan
us lala-ru ko dekh ke khamosh ho gae
ai jaan dekhte hi mujhe duur se tum aaj
ye kaun si ada thi ki ru-posh ho gae
rahte the be-hijab mire paas jin dinon
ve roz haae tum ko faramosh ho gae
duniya o diin ki na rahi ham ko kuchh khabar
hote hi us ke samne behosh ho gae
‘bedar’ bas-ki roe ham us gul ki yaad men
sar-ta-qadam sarishk se gul-posh ho gae
Leave a Reply