Tanveer Ahmad Alvi
ajiib shaḳhs hai patthar se par banata hai
dayar-e-sang men shisha ka ghar banata hai
jo zaḳhm phuul ki patti ka sah saka na kabhi
us aabla ko vo apni sipar banata hai
faza ka bojh samajhta hai chand suraj ko
vo gardanon pe sajane ko sar banata hai
jahan se qafila-e-vaqt raah bhula tha
unhin sarabon men vo rah-guzar banata hai
tarashta hai jigar vo bhi abginon se
ḳhazaf ko kasa-e-arz-e-hunar banata hai
dil-o-nazar ke fusun us ko raas aa na sake
vo a.inon se guzarne ko dar banata hai
ye kis se kahiye ki ‘tanvir’ ḳhud salibon ko
sukun-e-jan ke liye ham-safar banata hai
Leave a Reply