duur tak phail ga.i sab kei zaban tak pahunchi
baat tab ja ke mire vahm-o-guman tak pahunchi
pyaas ne mujh ko to bas maar hi Daala tha magar
kashish-e-zist miri ab-e-ravan tak pahunchi
ḳhaak jab ḳhaak se Takra.i to ik shor uTha
jaan jab jaan se guzri to amaan tak pahunchi
dhaḌkano men tiri aamad se vo jhankar hui
lab khule bhi nahin aur baat bayan tak pahunchi
meri ankhon se mire ḳhvab churane vaala
puchhta hai ki miri niind kahan tak pahunchi
koi to shai thi ‘alina’ jo in ankhon se chali
dil men paivast hui aur rag-e-jan tak pahunchi
Leave a Reply