dil men agar na ishq-o-mohabbat ki chaah ho
naala na dard ho na fughan ho na aah ho
rusva na e.atibar-e-taghaful ko kijiye
kya fa.eda ki pursish-e-dil gaah gaah ho
dushman se puchhta huun nishan-e-harim-e-naz
meri tarah se koi na gum-karda-rah ho
rah-e-junun men mujh ko kisi se nahin hai kaam
bas main huun aur ik dil-e-shorish-panah ho
kar ab tu fikr husn-e-amal kuuch hai qarib
rasta kaThin hai saath men kuchh zad-e-rah ho
tauhin-e-shan afv hai isyan se ijtinab
ya.ani gunahgar hai jo be-gunah ho
duniya men aise logon se paala paḌe na ‘shauq’
zahir ho jin ka saaf to batin siyah ho
Leave a Reply