ankhon men hain haqir jis-tis ke
nazron se gir gae hain ham kis ke
dil ka hamdam ilaaj mat kar ab
zakhm marham-pazir hain is ke
kaun aata hai aisa hosh-ruba
sabr o taqat yahan se kyuun khiske
dekhti hai ye kis ki ankhon ko
kyuun khule hain ye chashm nargis ke
bas kahin thak bhi asiya-e-falak
ho chuke surma ham to ab pis ke
ji se rahte hain apne us pe nisar
dil se hote hain dost ham jis ke
go nahin ab kabhi to ai pyare
ham bhi the yaar teri majlis ke
tu to khush hai ki tere kuche men
ek tadpa kare aur ik siske
mar gae par bhi ye ‘hasan’ na munde
muntazir chashm the tire kis ke
Leave a Reply